Het Drentse Boek

Wij hebt ok Nederlandstalige boeken!

Aoverveer, de neie bundel van Gré Seidell

aoverveer gre.jpgOp 8 okotober komp de neie bundel van Gré Seidell uut. De naam Aoverveer is niet zomaar ekeuzen, want Gré woont al sinds jaor en dag in Brabant. Zij is Drentse gedichten blieven schrieven en in Aoverveer kuj een selectie vienden van het wark van Gré Seidell-Broekhuizen. Het boek is vanof 8 oktober veur €12,50 te koop bij de Drentse Boekhandels en via de webwinkel van Het Drentse Boek. Hieronder kuj een gedicht van Gré Seidell lezen. Wi'j de foto's van de prissentatie zien? Of wi 'j het boek bestellen ?

gre.jpg




Oerkenbladties

An de boswal, langs het padtien,

greuit het kleine oerkenbladtien,

hoewel eeuwen bint vergaone,

of 't er altied hef estaone.

De blauwe bloempies an het staaltien,

vertelt een oerold volksverhaaltien;

onopvallend tussen 't grös

döt 't zien kleine hartien lös.

In het nederige blad,

hef het altied krachten had,

want ze trökken alle zeer,

zèe men vroeger, uut een zweer.

In het olde Drèentse laand

heurt de oerkenblatties plaant

umdat 't onbewust verwoordt

oenze eigen Drèentse aord.

De scheuvelloper

Krakend kreunt het in de sloten

strammig ritselt 't dreuge riet

langs de kaanten, waor de boten

vasteklemd ligt in de tied.

Mit vlagen jag in vage vegen

de dunne stoefsnei aover 't ies,

weeit hoge rillen tegen hegen:

witte strepen in het gries.

Het laand, de locht, 't verkleumde leven,

bevreuren in het gries pastel

mit grauwe blauwen, waorin even

een huver trekt deur 't strakke vel:

Een silhouettien, kroem gebeugen,

snid visgraotlijnen in de snei

en in de stilte - 't kwam anevleugen

iezer op ies - en 't is veurbij.

Dan keert de stilte, nao dit even

bewegen in de ienzaamheid

en krimpt van kolde weer het leven

töt starre onbewèeglijkheid.

Meer informatie over Gré Seidell-Broekhuizen



De activiteiten van het Huus van de Taol en Het Drentse Boek wordt mit meugelk maakt deur financiële ondersteuning van de provincie Drenthe.

Ga naar

Webwinkel Boeken