Het Drentse Boek

Wij hebt ok Nederlandstalige boeken!

Dikke arms, kleine bienties

Roelof Keen is veur veul meinsen in Drenthe gien onbekende, want zij kent hum van het rolstoelracen veur gehandicapten.Daor was e barre goed in; hij dee zelfs mit an de Paralympics en aandere grote wedstrieden.Daorbij beleefde hij wilde avonturen en die hef hij op papier ezet. In november komp zien boek Dikke arms, kleine bienties uut bij Het Drentse Boek.

 

Een veurpruufie:

De wupwap van oom Tinus ( hoe ik mien eerste rolstoel kreeg)

Mien va hef de oorlog van A tot Z metmaakt. Hij had er heel veul verhalen over. Van het neerstortende Duutse vliegtuug toen e an het eerappelkrabben was. Samen met mien tante Hillie tussen Möppen en Witteveen, en hij vertelde over het underduken umdat e niet naor Duutsland wol te warken, en over het carbidschieten met Tinus, dat ze deden um de moffen in de war te brengen toen de Tommy’s kwamen. Die Tinus was mien va zien kammeraod. Veur oes kinder was het oom Tinus.
Hij woonde in Stadskanaol en had een autosloperij.
Regelmaotig kwam hij met vrouw Trientje bij oes op visite.
Een grote knoestige man. Eeuwig een Caballero zunder filter op de lip, handen, zo groot, daor wuurden je bang van. Hij pruut ok een beetien raor, zo van: “Zit dien zeun nog aaid in dat zaikenhoes doar in Fraislaand?”
Want in weekeinde kreup ik ja gewoon deur de kamer as zie der waren.
“Ja,” zee mien va, “deur de week kröp hij daor.”
“Kroepen,” zee oom Tinus, “das ja nait niks veur hom. Ik heb genog old iezer en ik mok een waogentje veur hom.”
Echt waor, het volgende weekeinde was e der weer, met zien “waogentje” veur mij.
Een holten bakkie met drie wielen en twee stangen die aj die op en deel beweugen, het veurwiel andreven. Mien va zette mij er op en zee:
“Nou moej met die twee stangen wupwappen.”
Ik reed rondties over oes arf under het goedkeurend oog van mien va en oom Tinus. Beide een halve Caballero zunder filter op de lippe.
De wupwap was een feit.
En achterof is dit misschien wal de anzet veur mien sportcarrière west.


Roelof Keen

De activiteiten van het Huus van de Taol en Het Drentse Boek wordt mit meugelk maakt deur financiële ondersteuning van de provincie Drenthe.

Ga naar

Webwinkel Boeken