Het Drentse Boek

Wij hebt ok Nederlandstalige boeken!

Een haand achter 't gerdien van Leny Hamminga

Haand{multithumb}Vlak veur de Streektaalmaond komp Een haand achter 't gerdien uut. Leny Hamminga hef dit Drentstalige kienderboek eschreven. Het boek is uutekeuzen as donateursgeschenk van 2012! Kiek hier veur meer informatie.

Een haand achter het gerdien giet over de tienjaorige HJ. Eigenlijk heet hij Hendrik Jan, mar iederiene nuumt hum HJ. HJ woont samen mit zien pap, net buten een Noorddrents dorp. Olde buurman Jan is een grote kammeraod van HJ.
Net as Rudy, waor hij al mit speult vanof dat ze baby bint.

HJ is een onderzukend ventie, in ieder geval in zien kop. Want wat is er an de haand mit het huus van buurman Abbing, dat zo lange leeg stund. Hij meende toch dat hij daor steeds wat zag? Of verbeeldde hij hum dat nou? En is het waor wat de meiden op schoele zeden over Rudy? En waorumme wet hij niks over zien moeder? Iederiene wet toch waor zien mam is, waorumme wil gieniene der wat over zeggen? Aj tien jaor bint, bi’j gien klein kiend meer, dan wi’j gewoon ok weten wat de aandern weet..

En dus giet HJ op onderzuuk, veurzichtig en een beetie benauwd. Mar ok dapper en hoopvol.

En hij komp daorbij natuurlijk van alles tegen.

Leny Hamminga uut Taarlo schref al jaoren verhalen in het Drents.

In 2010 wun zij een pries bij de schriefwedstried van het Huus van de Taol en vanof die tied publiceert ze ok regelmaotig in de tiedschriften. Zij warkt in het basisonderwies en het is dan ok gien wonder dat heur eerste boek een jeugdboek is. Hoewel ze tot nou toe nog veurnamelijk verhalen veur volwassenen schreef.

Het boek is eschreven in makkelijk leesbaar Drents. Leny Hamminga schref helder, in korte zinnen en mit herkenbare umschrievings. Een Haand achter het gerdien is een boek veur kiender in de middengroepen van de basisschoele, waorin het niet allent giet um de belevenissen, mar ok um wat er in het heufd van hoofdrolspeuler Hendrik Jan gebeurt.
Ok meinsen en kiender die gien ervaring hebt in het lezen van Drentse boeken kunt dit verhaal zeker goed oppakken. Umdat het bestiet uut allemaole korte aparte verhaalties die samen de deurgaonde lijn vormt, is het heel geschikt um in delen te lezen/ of veur te lezen.

Daorumme bint in de Junior, die in meert overal op de schoelen verspreid wordt, ok twei verhalen van Een haand achter het gerdien op eneumen.

Dit boek zal binnenkort an oonze donateurs (de donateurs die as € 26,00 betaalt) opestuurd worden. Het is namelijk het donateursgeschenk van 2012!

Het boek is te koop bij de Drentse Boekhandels en vis de webwinkel van Het Drentse Boek en kost € 9,95

De activiteiten van het Huus van de Taol en Het Drentse Boek wordt mit meugelk maakt deur financiële ondersteuning van de provincie Drenthe.

Ga naar

Webwinkel Boeken