Het Drentse Boek

Alle boeken van Het Drentse Boek

Willem Pol oet de tied komen

Vleden week is nao een körte periode van zeeikte de Drèentse schriever Willem Pol oet de tied kommen. Willem Pol was een vrolijke, slim actieve man die altied gangs was met zien leeifhebberijen de motorsport, lokaole geschiedenis en de Drèentse taol. Willem is 78 jaor worden. Wij wèensen zien kinder, kleinkinder, vriendin en de rest van de femilie veul staarkte.

 

In Memoriam Willem Pol (*Tolbert 1936 - †Groningen 2014)

Willem Pol wör geboren in Tolbert in 1936 as zeun van een keuterboertie, mor het grootste deeil van zien leven hef e in Nörg woond, meer as vieftig jaor. In de taol van dat dörp schreef e ok, al sloop der bij toeren wel ies een woord oet ’t Westerkwarteer zien verhaolen binnen.

 

Zien Drèentse verhaolen, over Harm en Annechie, een echtpaor op leeftied, binnen bundeld in Nörger törfies, oetgeven bij Het Drentse Boek en Spoor in ’t zaand, dat oetgeven is bij Noordboek. Willem was een echte verteller, hij schreef gien stoere verhaolen, meer om ‘t plezeer van ‘t schrieven en lezen. Het binnen verhaolen met een glimlach, herkenbaor. Elkeneein hef wel zu’n older echtpaor in de buurt wonen. Wieder zörgen een eigenwieze schoondochter, een aordige kleinzeun en beste buren veur de invulling van het daogelijks leven van Harm en Annechie. In 2008 hef e bij de schriefwedstried van het Huus van de Taol de daarde pries wonnen met zien verhaol ‘Boerenkool’.

In april dee e nog met an tweei workshops kinderverhaolen schrieven van het Huus van de Taol.

Willem Pol was van begun jaoren zestig of metwaarker van Gremi, de Groninger Rijwiel- en Motor Industrie. Het bedrief besteeit niet meer, mor veur veul auto- en motorliefhebbers in Nederland is de bedriefsnaam nog altied een begrip.

Veur een maond of wat is der een boouk van Willem oetkommen over de geschiedenis van het Grunniger bedrief Gremi, waor Pol jaorenlaang waarkt heft. Het boouk beschrif min of meer de opkomst van de auto en motorfiets in Nederland. Willem Pol hef ok een boouk schreven over Nörger neringdoenden en ambachtslieden met de titel Mag het ietsje meer zijn (2007). Dat boouk steeit bij veul mèensken in Nörg as naoslagwaark in de kaast.

Pol was zölf ok actief in de motorsport, eerst as deelnemer, laoter bestuurlijk. Dik dartig jaor was e freelance-metwarker van het motormagazine Moto 73.

 

 

Dat het Drèents hum nao an het hart lag, blik oet zien overliedensadvertèensie. Een gedicht van humzölf:

 

Mien leven is veurbij

ik ben now oet de tied

heb der oethaold wat ik kun

mien leven is veurbij

 

plezier, verdreit, alles zat der in

het was het dan ok weerd

mien leven is veurbij

ik ben now oet de tied

 

Ga naar